ភ្នំពេញ៖ ប្រធានាធិបតីនៃសាធារណរដ្ឋសង្គមនិយមវៀតណាមលោក ង្វៀន សួនហ៊្វុក បានថ្លែងអំណរគុណដល់ព្រះរាជាណាចក្រកម្ពុជា ដែលបានបន្តឧបត្ថម្ភគាំទ្រ និងការអនុវត្តដោយគ្មានការរើសអើងចំពោះប្រជាជនមានដើមកំណើតវៀតណាមរស់នៅកម្ពុជានាពេលកន្លងមក។ នេះបើតាមសេចក្ដីថ្លែងការណ៍រួមរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាមក្នុងឱកាសនៃដំណើរទស្សនកិច្ចផ្លូវរដ្ឋរបស់ប្រធានាធិបតីវៀតណាមលោក ង្វៀន សួនហ៊្វុកនៅកម្ពុជា។

បើតាមសេចក្ដីថ្លែងការណ៍រួមនោះ ដើម្បីអបអរដល់ខួប៥៥ឆ្នាំនៃការបង្កើតទំនាក់ទំនងការទូត កម្ពុជានិងវៀតណាមបានឯកភាពជំរុញទំនាក់ទំនងកម្រិតខ្ពស់ និងការផ្លាស់ប្ដូរគណៈប្រតិភូគ្រប់លំដាប់ថ្នាក់ លើកទឹកចិត្តក្នុងការប្រាស្រ័យទាក់ទងរវាងប្រជាជន និងប្រជាជនជាពិសេសបណ្ដាខេត្តជាប់ព្រំដែន និងការគូសបញ្ជាក់ពីសារៈសំខាន់នៃការប្រាស្រ័យទាក់ទង និងអប់រំសាធារណជន ជាពិសេសយុវជននៃប្រទេសទាំងពីរ អំពីចំណងមិត្តភាពដ៏ស្មោះស័គ្រយូរអង្វែង សាមគ្គីភាព និងការជឿទុកចិត្តគ្នាទៅវិញទៅមក។ ក្នុងនោះប្រធានាធិបតីវៀតណាមក៏បានអរគុណដល់កម្ពុជាដែលអនុវត្តដោយគ្មានការរើសអើងមកលើជនជាតិខ្លួនផងដែរ។

របាយការណ៍ក្រសួងមហាផ្ទៃត្រឹមខែកក្កដា ឆ្នាំ២០២០ បានឱ្យដឹងថាកម្ពុជាមានជនបរទេសអន្តោប្រវេសន្ត និងសុំបណ្ណស្នាក់នៅអចិន្ត្រៃយ៍ចំនួន ៨៩ ៧៨៦នាក់ ស្មើនឹង ២៨ ៩៤៥គ្រួសារ ក្នុងនោះជនជាតិវៀតណាមមានច្រើនជាងគេចំនួន ៨៩ ៤៧១នាក់ ក្នុងនោះស្រី (៤២ ៨៣៦នាក់)៕